Heriok, ezinago herio

Hil arterainoko urteak,une guztiak

neureak dira,neureak ez beste

eta deusengatik ezeri

luzatuko nioke txeke zuririk.

Beste koordenatuetan eraiki beharko

mundu berria

aterik gabeko bideak

zabalduko dizkiguna.

Eguneroko egutegi estuki

finkatu eta programatuaren paraleloetan

ito. Gogoak

urkatuak ene antsiak

itoak izaten dira

ezin naiz mugitu

arnasik gabe hilak nahiak eta asmo berriak

diruaren truk

ezelan ez dut nik neure

bizia eskaintzan jarriko.

Heriotzaren garaipenarekin

egungo gizarte kapitalistaren ondasunak

zorioneko

maitasunaren ezintasuna

eta poesiaren

poesiaren porrota.

Heriok, ezinago Herio.


Bi artegatasun aurrez aurre

Edo portugaldar Poetak Van Gogh-i I, eta II

Van Gogh-en erantzuna. Azkena,elkarrenganako

zirrikitua.


I

Eta sosegurik ez.

Etsipenaren atakan bildu zaituela fatuak

zin egingo zenuke

zeure izu izkutuen guztiekin

saudadea eta egoneza zure barruan nahas jirabiraka

erraietan hesteetan, azken batean

zerbait fisikoa edo muinekoa ez ote den zalantzan

eta hor dakusazu aurre egin ezinik zeure burua

gainez eginda

artegatasuna aurrez aurre,zuri begira:


II

herra eternalak jota bezala

begi beileska horiek

sorginaizetan astintzen diren

bi zuhaitz zurrunbilatsu horiek

so egiten dizute

erantzunik gabeko itaunez beterik so egiten dizute

eta orduan,orduan Van Gogh-en zeru berdeak

behar dituzu aurkitu

uhinen oskoletan izar lokak artekatu ahal izateko

eta agian,agian erantzun posible bat osatu ere ahal izateko.


III

Zuek amestu ametsaren bila doaz

gauerdia zeharkatuz izar lokak.


Bizitza-gurpilaren gainean

Emaiozu korda erlojuari

eta amatatu argia

bihar, guk nahi ta nahi ez

argitu ere, argituko baitu, maitia


Baina, nor gara gu?

Nondik gatoz?

Nora goaz?


Bi ezerezaren arteko tarteune zentzugabea

dugu bizitza

Tarteune zentzugabeko esparru horretan

dena zentzugabekeria

Eta gu, absurdu horren karatula hutsak gu

besterik ez

eta orain amatatu argia


Merkatal gizarte alenori!

Madarikatua

madarikatua izan bedi

nire denbora

nire indarra

nire poza

nire beharra

nire egarria

nire mina

nire nahia

zenbakietara itzuli zituena

Madarikatua

Madarikatua


Infinitura

Joseba Sarrionaindiari


Infinitura begirada

galdua

Infinitura luzatua

irriño bat ezpainetan

irriño horren bazterretan

oinazea

Infinitura luzatua

esperantza

espainetan

irriño bat


zeinek daki

zertan duzun

jarrita gogoa


ez du axola

ez du axola


Infinituraino oinazea

luzatua

esperantza

ezpainetan

irriño bat

Infinitura luzatua


Zure irria

Beldur naiz

begiak ireki eta ez ote zaitudan berriro aurkituko

nire ondoan irrifarretsu.


Honetan egunak hogeita lau zementuzko ordu

orduak hirurogei hormigoi armatuzko minutu

zeinetan irri horrek badakien zabaltzen hamaika zirrikitu.


Beldur naiz

begiak ireki eta ez ote zaitudan berriro aurkituko

nire ondoan irrifarretsu.


Ametsetan baina esna

ostadarrararen koloreak ene dastamenean

zoratzen naute eguzki epelak eta aire freskuak.


Begiak itxita margotuz noa zure ezpainak

udaberriaz blai zure bularrak

arratsean mendi-brisa zure sexua

ozpelean bazter hezeetako basamarrubiak

txiribitaz josita muino berdeak

etxe atarian aingerulore usaina


Eta zure irria


erreparatzen diodanean irrifarretsu eni begira

zin dagizut zohartzen dituela

barrunbe hotz-ilunak gozogabeak.


Zure irria

Irri horrek, maitia,

zohargia dakarkit aldeotara.


Bidegurutzetan

Bidegurutzetan topatzen dira gizonak

antzinako kondairak hala dio eta hala berretsi ere eskuizkribuek

bidegurutzetan gizasemeen topagune

ideia berrien, kultura ezberdinen iraganbide

haize xuxurlarien pasagune

suertatze horrek markaturik gizonak

hortik aurrera elkarrekin doaz edo ez

edo bakarrik segi

bidegurutzetan egiten dute topo gizonek eta bidelagun bilakatu ere

bidelagunen solasaldia, elkartrukatze ezinago aberatsa

eta bostekoa despeditzean

abiapuntua gogoan ez, ezta axola ere

Bidegurutzetan topatzen dira gizasemeak

ateak, ezpatak, ibaiak eta ohian magikoak

gailurrak, sugarrak, basoak eta zelai sorginduak

bidegurutzetan erromes, gerlari, kontrabandista, bidaiari

munduaren hastapenetatik

munduaren hastapenetatik

bere bidaietan gizona beste gizonekin aurkitu da beti

sekula ez emakumearekin,inoiz ez ba gizalabarekin

-ez bada dorretxetan gatibu direla-

zeren eta emakumeak gutxitan izan baitira bidaiariak

(Zergatik baina?)


Gaua duzu begietan

Altzorik gabeko hodeiertzean

artegatasun guztiak biltzen

diren lerro ubel horretan

aurkituko dituzu,diote,

begi tristetu guztiak.


Gaua bihotz-begietan

amets galdu baten itzala

betartetik amildua

uraren iragatzea

gogo zahar,atzipetua.


Gaua duzu begietan

eskuen artean ezpainak.


Lainopean Urbasa

Udagoiengo basoa

urdinska umeletan

pagoak oinutsik

xuxurlaka

lihozko amets guztiak

eskutik helduta

dantzaka

Lainopean Urbasa

eta goren ezpainetan

hitz bakar bat

zein gizalabak duen

denetan preziatuena

Libertatea